Bakıda qardaşlıq nümayişi | “Düşmən” qüvvələrinə sarsıdıcı zərbə!

Bakıda Azərbaycan, Qazaxıstan, Qətər, Özbəkistan, Pakistan və Türkiyə xüsusi təyinatlılarının iştirakı ilə “Sonsuz qardaşlıq - IV” çoxmillətli birgə təlimi keçirilir.

Bu barədə Müdafiə Nazirliyindən məlumat verilib.

Açılış mərasimində çıxış edən general-polkovnik Zakir Həsənov qeyd edib ki, artıq 4-cü ildir ki, keçirilən və ənənəvi xarakterə malik xüsusi təyinatlı qüvvələr təlimi iştirakçı ölkələr arasında hərbi əməkdaşlığın, dostluq və qardaşlıq münasibətlərinin canlı nümunəsidir.

Bildirilib ki, zirehli texnika, ordu aviasiyası və pilotsuz uçuş aparatlarının cəlb edildiyi çoxmillətli təlimdə 6 ölkənin xüsusi təyinatlı hərbi qulluqçuları iştirak edir. Birgə təlimin əsas məqsədi dost və müttəfiq ölkələrin xüsusi təyinatlı qüvvələri arasında birgə xüsusi əməliyyatların keçirilməsi sayəsində təcrübə mübadiləsinin aparılması, bacarıqların təkmilləşdirilməsinin inkişaf etdirilməsidir.

Qeyd edək ki, “Sonsuz qardaşlıq - IV” çoxmillətli birgə xüsusi təyinatlı qüvvələr təlimində xüsusi təyinatlı bölmələr döyüş taktikaları üzrə atəş, paraşüt, snayper, eləcə də yaşayış məntəqəsinin düşməndən təmizlənməsi mövzuları üzrə təlim-döyüş tapşırıqlarını yerinə yetirəcəklər.