Bakıda vacib yenilik | Nəqliyyatla bağlı hansı işlər görülür?

“28 May” və “Cəfər Cabbarlı” stansiyaları arasında əlavə keçid tikiləcək.

Bunu jurnalistlərə açıqlamasında “Bakı Metropoliteni” QSC sədrinin müşaviri Emil Əhmədov deyib.

“İki elektrik yarımstansiyasının tikilməsi, “Dərnəgül” deposunun tamamlanması, vaqon parkının əsaslı şəkildə yenilənməsi, eyni zamanda xətlərin ayrılması istiqamətində işlər aparılacaq. Qeyd olunan layihələrin içərisində ən vacib olanlardan biri də Bakıda nəqliyyat sıxlığının aradan qaldırılmasında öz töhfəsini verəcək xətlərin ayrılması layihəsidir. Yəni Yaşıl və Qırmızı xətləri nəzərdə tuturuq.

Bildiyimiz kimi, həmin yollarda kəsişmə bir yoldan istifadə mövcuddur. Bu da kifayət qədər intervalın yaranmasına gətirib çıxarır. Hazırda interval 4 dəqiqə təşkil edir. Bu, 2 illik mürəkkəb bir layihədir. Layihəyə “Cəfər Cabbarlı” və “Nizami” stansiyaları arasında 200 metrlik birləşdirici tunelin inşası, eyni zamanda bu stansiyaların yaxınlığında 2 yarımstansiyanın tikintisi və “28 May” və “Cəfər Cabbarlı” stansiyasında əlavə sərnişin keçidinin inşası və təbii ki, “Dərnəgül” deposunun tikinti işlərinin tamamlanaraq istismara verilməsi daxildir”, ‒ müşavir vurğulayıb.