Bakının bu qəsəbəsində subasmalara son qoyacaq tədbir görüldü

Bakının Xəzər rayonu, Şağan qəsəbəsi, yeni sahə adlanan ərazidə yağış və qrunt sularının kənarlaşdırılması üçün drenaj sistemi qurulur.

Bu barədə İri Şəhərlərin Birləşmiş Su Təchizatı Xidməti məlumat yayıb.

Bildirilib ki, Xəzər rayon Sukanal İdarəsi tərəfindən layihə üzrə diametri 160 millimetrlik 700 paqonometr təzyiqli xəttin inşası tamamlanıb.

Qəsəbəyə uzunluğu 785 paqonometr olan özüaxımlı kanalizasiya xətti çəkilib. Xəttin 400 paqonometri diametri 400 mm, 385 paqonometri isə diametri 300 mm-lik boru ilə inşa olunub. Bundan başqa, 20 ədəd baxış quyusu quraşdırılıb.

Hazırda ərazidə tikinti quraşdırıma işləri davam etdirilir.

Qeyd edək ki, kanalizasiya sistemi mövcud olmayan ərazilərdə Dövlət Su Ehtiyatları Agentliyinin sifarişi ilə təchizat sisteminin qurulması məqsədilə müvafiq layihə sənədləri hazırlanıb. Layihələrin icrası şəbəkənin mövcudluğu, texniki vəziyyəti və digər amillər nəzərə alınmaqla həyata keçirilir. Yaşayış məntəqələrində tullantı su şəbəkəsinin inşası tədbirlər planına uyğun olaraq mərhələli şəkildə aparılır.