Bakının mərkəzində keçilməz küçə | Baku TV-nin çəkdiyi problem həllini tapdı

Nəsimi rayonu, Sabit Rəhman küçəsində yaşayan sakinlər yol problemindən şikayətçidirlər.

Onlar bildiriblər ki, sözügedən küçədə vaxtilə asfalt olub. Bəzi kommunal qurumlar ərazidə təmir işləri aparılan zaman yolun asfalt örtüyü dağılıb.

Kommunal qurumların əməkdaşları sakinlərə bildiriblər ki, işlərini tamamladıqdan sonra yolun asfalt örtüyü yenidən bərpa ediləcək. Buna baxmayaraq, verilən vədlər boşa çıxıb:

“Yol çox yaxşı idi. “Azərişıq”, sonra da “Azərsu” gəlib qazdı. Kimin ağlından nə keçirsə, qazırlar, sonra da məhəllə camaatı torpaqlaya-torpaqlaya gedir. Nə evdən çıxa bilirik, nə də evə gedə bilirik. Bütün ayaqlarımız palçığa, suya batır”.

Məsələ ilə bağlı Avtomobil Yolları Dövlət Agentliyindən bildirilib ki, Baku TV-nin çəkilişindən sonra əraziyə təmir briqadası göndərilib. Gün ərzində həmin ərazidə asfalt-beton örtüyünün bərpası istiqamətində işlər aparılaraq yekunlaşdırılacaq.