Bataqlığa çevrilən Əmircanın sakinləri acınacaqlı durumda | “Qanunsuzdursa, niyə qoyurlar ki...”

İstər paytaxtda, istərsə də bölgələrdə kanalizasiya probleminin tam həll olunmadığı ərazilər hələ də mövcuddur.

Bakı şəhəri, Suraxanı rayonu ərazisində yerləşən Əmircan qəsəbəsinin sakinləri də uzun illərdir ki, antisanitar vəziyyətdə yaşamağa məcbur qalıblar.

“Bizim kənd sovetimiz dedi ki, ora dağlıq ərazidir, kanalizasiya şəbəkəsinin inşası çətin prosesdir. İndiki dövrdə kanalizasiyasız, antisanitar vəziyyətdə yaşamağımız nə dərəcədə düzgündür? Hər səhər ayağımız kanalizasiya suyuna bata-bata işə gedirik”, – deyə sakin narazılığını dilə gətirib.

Məsələ ilə bağlı Suraxanı Rayon İcra Hakimiyyətindən bildirilib ki, Suraxanı Rayon Sukanal İdarəsinin məlumatına görə, məhəlləarası küçələrin magistral xəttə qoşulması layihədə var və maliyyə vəsaiti ayrıldıqdan sonra layihə həyata keçiriləcək.

İri Şəhərlərin Birləşmiş Su Təchizatı Xidmətindən isə qeyd edilib ki, sözügedən ünvanda Xidmətin mərkəzləşdirilmiş tullantı su şəbəkəsi mövcud deyil. Şəbəkələrin inşası Dövlət Su Ehtiyatları Agentliyinin tədbirlər planına uyğun olaraq mərhələlərlə aparılır.

Xüsusilə diqqətə çatdırılıb ki, fevral ayından su və kanalizasiya təchizatına qoşulmaq üçün yeni qaydalar tətbiq edilir. Bu qaydalara uyğun olaraq təchizat sisteminə qoşulmaq istəyən vətəndaşlar müvafiq sənədlərlə “ASAN xidmət” və “ASAN Kommunal” mərkəzlərinə müraciət etməlidirlər.