Bazardan gələndə çətinlik çəkirik | Xətai sakinlərinin şikayətinə niyə baxılmır?

Xətai rayonu Məhəmməd Hadi küçəsindəki 9 mərtəbəli binanın 8-ci blokunda 1 həftədən çoxdur ki, lift işləmir.

Sakinlərin sözlərinə görə, aidiyyəti qurumlara dəfələrlə müraciət etsələr də, onların probleminə baxılmayıb.

“7 mərtəbəni piyada qalxıb enirik. Bazardan yüklə gələndə yuxarı qalxmaq çətindir. Bütün aidiyyəti qurumlara şikayət etdik, baxmadılar. Guya ki, nəsə qırılıb, onun 40 manat xərci var. 40 manatdan yana biz əziyyət çəkirik”, – deyə sakin söyləyib.

Məsələ ilə bağlı Bakı Şəhər “Lifttəmir” İstehsalat Birliyindən bildirilib ki, sözügedən ünvanda nasazlıqla bağlı avqust ayının 27-də birliyə müraciət daxil olub. Mütəxəssislər tərəfindən məsələ araşdırılaraq lazım olan ehtiyat hissələri sifariş edilib. Liftin yaxın günlərdə təmir edilərək istifadəyə verilməsi təmin ediləcək. Həmçinin sakinlərdən təmirə görə ödəniş tələb edilməsi ilə bağlı iddiaların da əsassız olduğu bildirilib.