“Həyət-bacada görünən adamlar deyildi” | Oğul ananı bıçaqladı? - Qonşu danışdı - Baku TV

Xətai rayonunda bıçaqlanma hadisəsi baş verib.

Hadisə rayonun General Əliağa Şıxlinski küçəsində yerləşən binalardan birinin birinci mərtəbəsindəki mənzildə qeydə alınıb.

Belə ki, 51 yaşlı Mehriban Abdullayeva oğlu tərəfindən bıçaqlanıb.

Məlumata görə, cinayəti törətməkdə şübhəli bilinən şəxs bir müddətdir əsəb xəstəliyindən əziyyət çəkirmiş. Hadisə günü o, mətbəx bıçağı ilə özünə xəsarət yetirmək istəyib. Bu zaman anası ona mane olmağa çalışıb. Nəticədə, oğul anasına bıçaqla xəsarət yetirib.

Ağır vəziyyətdə olan qadın təcili tibbi yardım briqadası tərəfindən Sabunçu Tibb Mərkəzinə çatdırılıb.

TƏBİB-dən verilən məlumata görə, yaralıya xəstəxanada zəruri tibbi yardım göstərilib və o, müalicə üçün tibb müəssisəsinə yerləşdirilib. Hazırda vəziyyətinin stabil olduğu bildirilir.

Qeyd edək ki, hadisəni törətməkdə şübhəli bilinən şəxs polis əməkdaşları tərəfindən saxlanılıb.

Məlumata görə, ailə həmin mənzildə ata, ana və oğul olmaqla birlikdə yaşayıb. Şübhəli şəxsin səhhətindəki problemlərə görə böyük qardaşı bir müddət əvvəl ailəsi ilə birlikdə evdən köçüb.

“Heç inanmağım gəlmir. 16 ildir burada yaşayırlar. Yaxşı ailə idi, zəhmətkeş, başıaşağı insanlar idilər. Hamısı işləyirdi. Həyətdə çox görünmürdülər. Ancaq oğlanın əsəbi, deyəsən, yerində deyil”, – qonşu deyib.