Bazarlarda nar niyə yoxa çıxıb?

Satıcılar bir kiloqram narın qiymətinin 30 qəpikdən 2 manatadək artdığını bildirib.

Bəs hazırda mövsümü olan nar niyə bahalaşıb?

Satıcıların sözlərinə görə, səbəbi nar qıtlığının olmasıdır. Əksər bağlarda narlar çürüyüb.

Azərbaycan Nar İstehsalçıları və İxracatçıları Assosiasiyasının sədri Fərhad Qaraşov bildirib ki, bu il yağıntıların bol olması, yay aylarında isə günvurma və isti havaların müşahidə edilməsi narlarda partlama və çürüməyə səbəb olub:

“Əsasən topdansatış zamanı qiymət artımı müşahidə edilir. Lakin bazarlarda qiymət 5-8 manat arasında dəyişir. Regionlarda isə daha ucuzdur”.

İqtisadçı Eldəniz Əmirov isə qiymət artımını narın istehsal həcmlərinin azalması ilə əlaqələndirib:

“Halbuki 2022-ci ildə əvvəlki illə müqayisədə 4,8 dəfə narın istehsal həcmi artıb. Hazırda isə həm ixraca istiqamətlənməsi, eyni zamanda istehsalın az olması qiymətlərin hazırkı artımını şərtləndirir”.

Deyilənlərdən belə nəticə hasil olur ki, narın qiymətində artım davam edəcək.