Bizə deyirdilər ki, meyitiniz çıxacaq oradan... | Qazaxlı evdar xanım boşanmalardan danışdı

“O vaxtlar” verilişinin yeni buraxılışı yayımlanıb. Proqramın budəfəki qəhrəmanı qazaxlı Əsqinaz Şəmsiyeva olub.

Boşanmaların səbəblərindən danışan Əsqinaz Şəmsiyevanın sözlərinə görə, hazırda bəzi insanlar daha çox maddi maraqlara önəm verdikləri üçün ailələrini qoruyub saxlaya bilmirlər:

“O vaxtlar boşanmalar tək-tük, bıçaq sümüyə dirənəndə olurdu. Ailə quranda bizə deyirdilər ki, o evdən meyitiniz çıxacaq. Əvvəlki gəlinləri qayın, qayınana vursa da, dillənmirdilər. Amma müasir gəlinlər ailəni yola vermirlər. Bunun da səbəbi anaların cavan ailəyə müdaxilə etməsidir. İndi qız evləndirəndə oğlanın kimliyi onları maraqlandırmır, daha çox imkanının olmasına baxırlar. Bəzən oğlanlar belə varlı qız axtarırlar. Belə insanlar isə əziyyət çəkmədikləri üçün ailə ola bilmirlər”.

Əsqinaz Şəmsiyeva həmçinin qardaşının həyat yoldaşı ilə yaşadığı problemlərdən bəhs edib: “Anamın qabağına çox qəddar gəlinlər çıxdı. Mən və bacılarım gəlin anamızla yaxşı rəftar etməsə də, heç vaxt ona pislik etmədik. Qardaşımla münasibətim çox yaxşı idi. Amma gəlin elə vəziyyət yaradırdı ki, qardaşım anamla məni görəndə elə bil qutuda ilan görürdü”.