Bloger Nikosayağı törətdiyi qəzaya görə cəzalana bilər

“Nikosayağı” kimi tanınan Nicat Şakirlinin törətdiyi qəza nəticəsində avtomobildə olan Gəncə şəhər sakini 1996-cı il təvəllüdlü Ruslan Məmmədov həyatını itirib.

Sürücü Nicat Şakirli və Fəxri Rüstəmov tibb müəssisələrinə təxliyə olunublar. Nicat Şükürlünün qolu amputasiya olunub, reanimasiyadadır.

Hadisə yerinə kömək etmək üçün gələn vətəndaş Fəxri Rüstəmov xəsarət alıb. Nəqliyyatın hərəkətini tənzimləməyə çalışan polis əməkdaşını isə maşın vurub.

Bəs sürücü Nicat Şakirlini qəza səbəbilə hansı cəza gözləyir?

Hüquqşünaslar bildirirlər ki, ekspertiza rəyindən sonra məsələ aydınlaşacaq:

“Sürücü əgər sükanda olarkən içkili vəziyyətdə olubsa, bu zaman onu 5 ildən 8 ilədək azadlıqdan məhrumetmə cəzası gözləyir. Əgər sürücü sükan arxasında içkili olmayıbsa, bu zaman 2 ildən 6 ilədək azadlıqdan məhrum edilə bilər. Ekspertiza rəyindən sonra tətbiq ediləcək cəza arta, yaxud azala bilər”.

Ekspertlər sözügedən hadisə ilə bağlı azadlıqdan məhrumetmə cəzasına alternativ olaraq cərimə tətbiqinin qanunla nəzərdə tutulmadığını da qeyd ediblər.