Bu kəndlərə niyə gəlib-gedən yoxdur? - Turizm imkanı yüksək olsa da...

Ölkəmizdə təbiəti, təmiz havası və bulaqları ilə insanları valeh edən bir çox kənd var.

Təəssüf ki, bu kəndlərə nəinki turistlər, hətta yerli sakinlər belə rahat şəkildə gedib-gələ bilmirlər. Məhz bu səbəbdən ötən il belə kəndlərdə turizmi inkişaf etdirmək məqsədilə “Turistik kənd” layihəsinə start verilib.

Lerik rayonunun da bir neçə kəndi sözügedən layihəyə daxil edilib. Onlardan biri də Bibhoni kəndidir.

Layihə çərçivəsində Bibhoni kəndində yenidənqurma işləri aparılacaq, eyni zamanda turistlərin buraya cəlb edilməsi üçün tədbirlər görüləcək.

“Kəndə asfalt yol çəkilsə, gediş-gəliş xeyli asanlaşar. Biz burada yaşayırıq və yolun təmiri ilk növbədə bizim rahatlığımız üçündür”, – deyə kənd sakini bildirib.

Qeyd edək ki, əvvəlcə Qusar rayonunun Laza kəndi, Qax rayonunun İlisu və Sarıbaş kəndlərində reallaşacaq layihə çərçivəsində aqroturizm zərfi üzrə ümumilikdə 20 qonaq evinin zəruri avadanlıqlarla təmin edilməsi nəzərdə tutulur. Daha sonra isə bu layihə Lerik və Daşkəsən rayonunda da həyata keçiriləcək.