Bu proses 24 ildir ki, davam edir | Ekspertdən Xəzər dənizi barədə vacib açıqlama

Aktaudan olan geoloq Kosarbay Kojahmet hesab edir ki, Xəzər dənizinin səviyyəsi 25 ildən sonra yenidən qalxacaq.

Alim Xəzər dənizinin səviyyəsinin azalmasının təbii proses olduğunu diqqətə çatdırır. Təbii dalğalanmalar səbəbindən dənizdə suyun səviyyəsi 50 il ərzində qalxır, daha sonra həmin müddət ərzində aşağı düşür.

“Biz bu prosesi dayandıra bilmərik, çünki onu dəstəkləmək üçün yetərincə suyumuz yoxdur. Dəqiq məlumat olmadığından dənizə daxil olan suyun miqdarının azaldığını və ya olduğu kimi qaldığını söyləmək çətindir.

Volqa və Ural çaylarının suları Xəzər dənizinə axan bütün suların 88 faizini təşkil edir. Digər kiçik çaylar da dənizə su gətirir. Dənizin səviyyəsi 1999-2001-ci illərdə pik həddə çatmışdı. Lakin 2001-ci ildən suyun səviyyəsi yenidən azalmağa başlayıb”, − deyə professor qeyd edib.

Mütəxəssisin sözlərinə görə, suyun geri çəkilməsi prosesi 24 ildir ki, davam edir. Xəzər dənizinin səviyyəsi eyni müddət ərzində azalmağa davam edə bilər.

Kosarbay Kojahmet qeyd edir ki, Xəzər dənizinin Azərbaycanla Türkmənistan arasındakı sualtı hissəsində az güclə də olsa, vaxtaşırı püskürən palçıq vulkanları var.

“Hazırkı şəraitdə dənizin altında geoloji hərəkətlər baş verir. Zəlzələ dəniz dibinin qalxmasına səbəb ola bilər. Yeraltı təkanlar daha da intensivləşərsə, suyun səviyyəsi qalxar”, − deyə mütəxəssis bildirib.