Bu, sadəcə həkimlərin səhvi deyil | TƏBİB-dən hamilələrə xəbərdarlıq

“Son illər nəinki Azərbaycanda, eləcə də bütün dünyada körpə ölümlərinin sayı artıb”.

Bunu TƏBİB-in icraçı direktoru Vüqar Qurbanov qurumun ilin yekunlarına dair keçirdiyi brifinqdə çıxışı zamanı deyib.

Onun sözlərinə görə, bu məsələdə TƏBİB də müəyyən səbəbləri araşdırır, çünki burada bir çox nüanslar var: “Ölümə səbəb olan halların aradan qaldırılması üçün aidiyyəti üzrə danışıqlar aparılır”.

V.Qurbanov həmçinin qeyd edib ki, keçən il TƏBİB-in tabeli tibb müəssisələrində ana ölümü faktı əvvəlki illə müqayisədə daha aşağı olub: “Hər ay bu məsələni nəzarətdə saxlayırıq. Ümid edirik ki, bu ilin göstəriciləri keçən ilə görə daha da aşağı olacaq”.

TƏBİB rəhbəri ana olacaq namizədlərə çağırış da edib: “Ölümlər tək həkim səhvi deyil. Ana olmağa hazırlaşan qadınlar vaxtında müayinələrdən keçməlidirlər. Xəstəxana şəraitində müalicə göstərişi varsa, evdə qalmasınlar. Fəsadlar nə qədər erkən aşkarlansa, ana və körpə ölümünün sayı bir o qədər azalmış olacaq”.