Bunu edən şəxsləri ağır cəza gözləyir | Detallar açıqlandı

Ali Məhkəmə vahid məhkəmə təcrübəsini müəyyən edən daha bir qərar qəbul edib. Qərar qanunsuz ağac kəsmə cinayəti ilə bağlıdır.

Bildirilib ki, məhkumların cinayət əməli törədərkən rollarının təşkilatçı, təhrikçi, icraçı və köməkçi kimi fərdiləşdirilməsi cinayət əməlinin qabaqcadan əlbir olan bir qrup şəxs kimi qiymətləndirilməsinə mane olan hal deyil. Yəni iki şəxs cinayət əməli törədərkən biri icraçı, digəri isə köməkçi olduqda da həmin əməlin qabaqcadan əlbir olan bir qrup şəxs kimi törədilməsi mümkündür.

Qeyd edilib ki, Cinayət Məcəlləsinin 259.1-ci maddəsinin obyektiv cəhəti “qanunsuz ağac kəsmə” olmasına baxmayaraq, burada cinayət əməlinin icraçısı yalnız bilavasitə ağacı kəsən deyil.

Həmçinin işin hallarından asılı olaraq kənarda dayanaraq hadisə yerinə gələn şəxslər barədə qrupun digər üzvlərinə məlumat verən, qrupun digər üzvünü sığortalayan, əli ilə və ya iplə, başqa alətlə ağacın kəsilməsini asanlaşdıran da məsuliyyət daşıyır.

Ağacın lazım olan istiqamətə aşmasına yardımçı olan, eyni zamanda kəsilən və ya doğranan ağacları kəsildiyi yerdən başqa yerə daşıyıb aparan şəxs də icraçı hesab olunmalıdır.