Car kəndində körpü qəzalı vəziyyətə düşdü | Əməkdaşımız hadisə yerində - Baku TV

Zaqatalanın Car kəndində Bəkməz çayı üzərində yerləşən körpü qəzalı vəziyyətə düşüb.

Sakinlərin sözlərinə görə, iyulun 7-8-də rayona yağan güclü leysan və yaranan sel körpünün bir hissəsini tamamilə dağıdıb.

Car kəndini Axaxdərə və Taxtalar kəndləri ilə birləşdirən körpüdə hərəkət məhdudlaşdırılıb. Beton plitələrin çökməsi səbəbindən həm piyadaların, həm də nəqliyyat vasitələrinin keçidi təhlükəli hesab olunur.

Sakinlərin gediş-gəlişi üçün çayın içərisindən müvəqqəti yol salınıb. Lakin çaya yenidən sel gələcəyi halda həmin yolun da bağlanacağı və kəndlərlə əlaqənin tamamilə kəsiləcəyi bildirilir.

Məlumata görə, körpünün qarşı tərəfində yerləşən kəndlərdə 600-ə yaxın fərdi yaşayış evi, ümumilikdə isə 3 mindən çox sakin var. Körpüdəki mövcud vəziyyət ərazidən keçən insanlar və mal-qara üçün də ciddi təhlükə yaradır.

Sakinlər bildirirlər ki, körpü əvvəllər də qəzalı vəziyyətə düşüb və burada təmir işləri aparılıb. Onların iddiasına görə, təmirin keyfiyyətsiz görülməsi körpünün yenidən dağılmasına səbəb olub.

Kənd sakinləri körpünün qısa müddətdə əsaslı şəkildə bərpa edilməsini və təhlükəsiz gediş-gəlişin təmin olunmasını istəyirlər.