Cərimələr bu qədər artırıldı | Saxta “parkovşiklər”i hansı cəza gözləyir?

“Yol hərəkəti haqqında” qanunda və İnzibati Xətalar Məcəlləsində edilən dəyişikliklər təsdiqlənib. Bununla bağlı Prezident İlham Əliyev fərman imzalayıb.

Nəqliyyat vasitəsinin parklanmasına görə müəyyən olunmuş ödəniş edilmədən və ya ödəniş edilmiş müddətdən artıq parklanma yerindən istifadə üçün əlavə ödəniş edilmədən sürücünün parklanma yerini tərk etməsinə görə cərimə 20 manat olub.

Digər dəyişikliklə parklanma yerində müvafiq yol nişanları və nişanlama xətləri ilə müəyyən edilmiş parklanma üsulunun sürücü tərəfindən pozulması nəticəsində digər nəqliyyat vasitəsinin növbəti parklanma yerində qanuna uyğun parklanması qeyri-mümkün olduqda və ya digər nəqliyyat vasitələrinin hərəkətinə maneə yaratdıqda 20 manat məbləğində cərimə olunacaq.

Daha bir dəyişikliklə parklanma yerlərində icazə verilmiş maksimum kütləsi 3,5 tondan çox olan yük avtomobillərinin parklanmasına, habelə rezervasiya edilməsi və ya digər üsullarla sərbəst parklanmasına maneələr yaradılmasına görə 20 manat məbləğində cərimə ediləcək.

Bundan əlavə, əlilliyi olan şəxslərin nəqliyyat vasitələri üçün nəzərdə tutulmuş parklanma yerlərini zəbt edənlər 60 manat cərimə ediləcək. Qeyd edək ki, həmin cərimələrin əvvəlki məbləği 10 manat idi.

Dəyişikliklə dövlət avtomobil yollarında səlahiyyəti olmayan şəxslər tərəfindən parklanma yerlərinin təşkili, xidmətin göstərilməsi, yaxud ödənişin tələb edilməsinə görə fiziki şəxslər 100 manatdan 200 manatadək, vəzifəli şəxslər 300 manatdan 500 manata qədər cərimə ediləcək. İşin halları və pozuntu törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda 15 günədək müddətə inzibati həbs tətbiq edilərək, hüquqi şəxslər 1 500 manatdan 2 000 manatadək məbləğdə cərimə olunacaq. Nəqliyyat vasitəsini idarə etmək hüququ olmadan sürücülük edənlərə 200 manat məbləğində cərimə nəzərdə tutulub.

Daha bir dəyişikliklə tənbeh almış şəxs tərəfindən inzibati tənbeh vermə haqqında qərar qüvvəyə mindiyi gündən bir il ərzində təkrar törədilməsinə və ya nəqliyyat vasitəsini idarə etmək hüququ məhdudlaşdırılmış şəxs sürücülük edərsə, 400 manat cərimə ödəyəcək.