N.Nərimanov abidəsinin yaxınlığında hərəkətin təşkili necə olacaq? - NECƏ OLMALIDIR?

“Necə olmalıdır?” rubrikasının yeni buraxılışı yayımlanıb.

Bu dəfə Nəriman Nərimanov abidəsinin yaxınlığında hərəkətin təşkili ilə bağlı təklif olunan dəyişikliklər haqqında məlumat verilib.

Bildirilib ki, sözügedən ərazidə işıqforların quraşdırılması planlaşdırılır və bu, piyadaların hərəkətinin təmin olunmasına hesablanıb.

“Buradakı parkda uşaqlar üçün yellənçəklər, yaxud istirahət üçün infrastruktur çox aşağı səviyyədədir. Bu parka gələnlərin sayı yay aylarında belə az olur. Belə olan halda ətrafında 5-6 piyada keçidinə nə ehtiyac var?! Xüsusilə də yoxuşu yuxarı qalxan sürücülər üçün qarşıda işıqforun olması əlavə problem yaradacaq”, – deyə əlavə edilib.

Vurğulanıb ki, yeni dəyişiklikdən sonra ərazidə avtomobillərin parklanması üçün icazə verilən yerə giriş qadağan olunacaq:

“Hərəkətin optimallaşdırılması və vətəndaşların rahatlığının təmin edilməsi üçün bu ərazilərdə parklanma yerlərinin salınması daha doğru seçim olardı. Məqsəd hərəkətin optimallaşdırılmasıdırsa, həm Mikayıl Müşfiq küçəsindən düşənlər üçün, həm də Qurban Xəlilov küçəsindən gələnlər üçün 1.11 üfiqi nişanlanma xətti çəkilməli, yaxud ayırıcı zolaq salınmalıdır”.