Çindən 8 min tabutun gətirilməsi barədə xəbərə rəsmi reaksiya

Bu günlərdə açıqlanan bir statistika cəmiyyətdə olduqca marağa səbəb oldu.

Məlumata görə, Çindən ölkəmizə ötən ilin 10 ayında 8 min tabut gətirilib.

Dövlət Gömrük Komitəsindən Azərbaycana Çindən 8 min ədəd tabutun gətirilməsi barədə sosial şəbəkələrdə yayılan xəbərə aydınlıq gətirilib.

Komitədən "Modern.az"ın sorğusuna cavab olaraq bildirib ki, ölkəyə 8 min ədəd taxta paltar sancağı gətirilib.

Sadəcə gömrük bəyannaməsində malın təsviri və 2 kodunda yol verilən texniki xəta səbəbindən paltar sancağı kimi yox, tabut kimi qeydə alınıb.

Çindən idxal edilən "taxta paltar sancaqları" malı rəsmiləşdirilən zaman gömrük bəyannaməsində malın təsviri və kodun ilk 4 rəqəmi düzgün qeyd olunub, növbəti 5-ci və 6-cı rəqəm səviyyəsində isə texniki xətaya yol verilib.

Bildirilib ki, gömrük bəyannaməsində müvafiq düzəliş edilməklə texniki xəta aradan qaldırılıb.