COP29 könüllüləri İçərişəhərdə | Gənclərdən heyvanlarla bağlı nümunəvi addım

COP2COP29 Azərbaycan Əməliyyat Şirkəti ətraf mühitin mühafizəsində kollektiv iştirakçılıq və məsuliyyətə çağırış olaraq “Kiçik dostlarımız üçün təkrar istifadə” şüarı altında ekoloji aksiya təşkil edib.

Tədbir “İçərişəhər” Dövlət Tarix-Memarlıq Qoruğunun tərəfdaşlığı ilə qədim tarixi və təbii gözəlliyi ilə seçilən İçərişəhərdə baş tutub.

COP29-da könüllülərlə iş üzrə sektor müdiri Adilə Əliyevanın verdiyi məlumata görə, aksiya çərçivəsində COP29 könüllüləri öncədən toplanan tullantı materiallarından təkrar istifadə etməklə funksional quş yuvalarının hazırlanması üçün bir araya gəliblər.

Bildirilib ki, yuvaların bir qisminin Qala Qoruğunda quraşdırılması nəzərdə tutulur.

Qeyd edək ki, COP29 könüllülərinin nəzəri bilik və praktiki fəaliyyətlərini birləşdirərək reallaşdırdıqları bu təşəbbüs mühüm iqlim məsələlərindən biri olan tullantıların idarəedilməsi və ətraf mühit, flora və faunanın mühafizəsi arasında olan əlaqənin vurğulanmasına, tullantıların məsuliyyətli idarəedilməsi kimi ekoloji dayanıqlı vərdişlərin gündəlik həyatda tətbiq edilməsinə ictimai diqqətin cəlb edilməsi, eləcə də kollektiv səylərin əvəzsiz rolunun bir daha vurğulanmasına xidmət edib.