“Çox qorxuludur, oğurluq edə bilərlər” | Telefonlarımıza yüklənən, bilmədiyimiz təhlükə

Son vaxtlar sosial şəbəklərdə ən çox müzakirə olunan mövzulardan biri də “casus app” adı ilə tanınan tətbiqlərdir.

Bu proqramlar vasitəsilə telefonumuza daxil olmaq, zənglərimizə qulaq asmaq, sosial şəbəkə hesablarımıza asanlıqla müdaxilə etmək mümkündür. Hətta bu tətbiqlərdə “endirimli paketlər” də təklif olunur.

Bəs bu təhlükənin qarşısını necə ala bilərik?

İnformasiya texnologiyaları üzrə mütəxəssis Elvin Abbasov deyir ki, bu, təkcə internet üzərindən deyil, “bluetooth” və digər protokollarla da mümkündür.

“Əgər telefonunuz yaddaşı dolu olmadığı halda normadan artıq isinirsə və ağır işləyirsə, bu, izlənildiyinizə işarə ola bilər. İctimai yerlərdə açıq internetə qoşulduqda belə, onlar telefonunuza daxil ola bilərlər.

Bundan qorunmaq üçün tanımadığınız faylları açmamalı, ictimai “Wi-Fi” şəbəkələrindən uzaq durmalısınız”, ‒ deyə E.Abbasov xəbərdarlıq edib.

Hüquqşünas Hikmət Əliyevin sözlərinə görə, Azərbaycan Respublikasının Konstitusiyasına əsasən, heç kim başqasının şəxsi həyatına müdaxilə edə bilməz. Belə hallar Cinayət Məcəlləsinin 156-cı maddəsinə əsasən şəxsi və ailə sirrinin pozulması kimi qiymətləndirilir və qanunla cəzalandırılır.