Daşaltıda itkin düşən hərbçimizin nəşi 31 il sonra Xaçmaza gətirildi

Birinci Qarabağ müharibəsi zamanı Daşaltıda itkin düşmüş, 31 il sonra qalıqları tapılaraq doğulduğu Xaçmaz rayonunun Kiçik Baraxum kəndinə gətirilən Niftəliyev Adil Kamal oğlu ilə vida mərasimi keçirilib.

1966-cı il təvəllüdlü Adil Niftəliyev hərbi xidmətdən sonra Bakıda dəmiryolçu kimi çalışıb. Birinci Qarabağ müharibəsi başlayanda isə könüllü cəbhəyə yollanıb. Malıbəyli, Kərkicahan, Kosalar kəndləri uğrunda gedən döyüşlərdə fəal iştirak edib. 1992-ci il yanvarın 26-da Şuşada Daşaltı əməliyyatı zamanı itkin düşüb. Düz 31 il idi ki, ailə Adil haqqında heç bir xəbər ala bilmirdi.

“31 ildə hər gün onun yolunu gözləmişik. Elə bilirdik ki, o, sağ gələcək. Anam oğlunun ölümünə dözməyərək dünyasını dəyişdi. Atam da onun dərdindən öldü. Anam əhd etmişdi, Adilin köynəyini özünə kəfən etdi”, – şəhidin bacısı Validə Cəmaləddinova deyib.

Qeyd edək ki, vida mərasimindən sonra şəhid hərbçimizin nəşi Dədəli kənd qəbiristanlığında torpağa tapşırılıb.