Dedilər ki, milləti qırırlar... | “Bakı Metropoliteni”nin əməkdaşları yaşadıqları faciədən danışdı

1990-cı il yanvarın 19-dan 20-nə keçən gecə Azərbaycan tarixinə qanla yazılıb.

Həmin gecə saat 23:30-da SSRİ Ali Soveti Rəyasət Heyətinin “Bakı şəhərində fövqəladə vəziyyət elan edilməsi haqqında” Fərmanına əsasən, Sovet qoşunları Bakı şəhərinə yeridilmişdi.

Şəhərə qoşun yeridiləcəyi ilə bağlı məlumat alan metropoliten əməkdaşları hərəkət qrafikində dəyişiklik etmək və 24 saat işləmək qərarı vermişdilər. Nəticədə minlərlə insan metronun içərisində gecələdi, daldalana bildi.

Məhz metropoliten əməkdaşlarının tələbi ilə “XI Qızıl Ordu” stansiyasının adı dəyişdirilərək “20 Yanvar” adlandırılıb. Bu addım 20 Yanvar faciəsində şəhid olan vətəndaşlarımızın xatirəsinə ehtiramın əlaməti idi.

Qanlı Yanvar günü növbədə olan “Bakı Metropoliteni”nin əməkdaşı Cahil Həsənov o müdhiş gecədə şahid olduqlarını Baku TV ilə bölüşüb:

“Həmin gün 23:00-da işimi qurtarıb evə getməli idim. Dörd nəfər idik. Təlimatçı maşinist məlumat verdi ki, evə gedənlər getməsinlər, çünki metro səhərə qədər işləyə bilər və kömək lazım olar. Biz də etiraz etmədik. Pilləkənləri qalxanda yaralı gətirildiyini gördük.

Dedilər Çapayev küçəsində insanları güllələyirlər. Bu barədə təlimatçı maşinistə xəbər verdik. Dəmiryol texnikumunun qarşısına çatanda baxdım ki, bir təcili yardım, eyni zamanda yük maşını vurulub yolda qalıb. Qarşısında şnel var idi, onu qaldıranda altında meyit gördüm.

“İçərişəhər”ə getdik. İnsanlar tunellərə düşüb qaçırdılar. Bu barədə dispetçerə məlumat verdik. Beləliklə, insanları götürüb kabinədən salona keçirdik”.