Diqqət tələb edən tapşırıqlarla qaçış arasında hansı əlaqə var?

Yaponiyanın Tsukuba Universitetinin neyrobioloqları cəmi 10 dəqiqəlik yavaş qaçışın əhvali-ruhiyyəni yaxşılaşdıra və beyinin diqqəti cəmləşdirmə qabiliyyətini müvəqqəti olaraq artıra biləcəyini müəyyən ediblər.

Tədqiqatda 24 sağlam gənc iştirak edib. Onlar müxtəlif günlərdə ya qaçış trenajorunda 10 dəqiqə sakit oturub, ya da çox aşağı intensivliklə 10 dəqiqə qaçıblar. Qaçış tempi orta hesabla kişilər üçün 6 km/saat, qadınlar üçün isə 4 km/saat olub.

İştirakçılar məşqdən əvvəl və sonra əhvali-ruhiyyələrini qiymətləndirib, diqqəti və avtomatik reaksiyaları idarə etmək qabiliyyətini ölçən Stroop testindən keçiblər. Eyni zamanda beyinin diqqət, davranış və emosiyalara nəzarətdə mühüm rol oynayan prefrontal korteksinin fəaliyyəti ölçülüb.

Nəticələr göstərib ki, yavaş qaçışdan sonra iştirakçılar özlərini daha enerjili və yaxşı əhvalda hiss edib, diqqət tələb edən tapşırıqları isə daha sürətli yerinə yetiriblər.

Alimlərin fikrincə, əhvali-ruhiyyənin yaxşılaşması qaçış zamanı bədənin şaquli hərəkətlərinin intensivliyi ilə də əlaqəli olub. Bu isə qaçışa xas ritmik hərəkətlərin müsbət təsirin yaranmasında rol oynaya biləcəyini göstərir.