Dişlərin qaralmasını dayandırmaq mümkündürmü?

"İnsan yaşa dolduqca, hətta yaxşı qulluq edilsə belə, dişlər qaralır".

Bu barədə rusiyalı stomatoloq, tibb elmləri namizədi Andrey Juk bildirib.

Mütəxəssisin sözlərinə görə, dişlərin rənginə minanın yaşla bağlı dəyişiklikləri, qida vərdişləri və dişlərin ümumi vəziyyəti təsir göstərir.

"Qaralmanı tamamilə dayandırmaq qeyri-mümkündür. Bu, yaşla bağlı təbii dəyişikliklərin bir hissəsidir. Lakin prosesi yavaşlatmaq və dişlərin təbii rəng tonunu qorumaq tamamilə mümkündür. İllər keçdikcə mina qatı incəlir və bunun nəticəsində daxildəki sarımtıl dentin təbəqəsi daha çox nəzərə çarpmağa başlayır. Bundan əlavə, dişlərdə qəhvə, çay, qırmızı şərab və tütündən qaynaqlanan piqmentlər yığılır ki, bunları da adi fırça ilə təmizləmək hər zaman mümkün olmur. Həmçinin yaşlandıqca dişlərin strukturu dəyişir, bu dəyişiklik xüsusilə siniri çıxarılmış dişlərdə daha qabarıq görünür. Belə hallarda dişin daxildən ağardılması üsulu kömək edə bilər", – deyə Andrey Juk bildirib.

Həkim onu da əlavə edib ki, dişlərin rəngini qorumaqda mütəmadi olaraq peşəkar təmizləmə, yumşaq diş fırçasından istifadə və qida vərdişlərinə nəzarət etmək böyük rol oynayır.