Doğuş zamanı ölümlərin sayı niyə artır? | Həkim səhlənkarlığı, yoxsa...

Sabirabad rayonu sakini Tacirə Zamanova gəlininin ölümü ilə bağlı fəryad edir.

Rayon Mərkəzi Xəstəxanasının doğum evində onun gəlini Zəhra Zamanova körpə dünyaya gətirərkən həyatını itirib.

Xatırladaq ki, bu həmin xəstəxanada baş verən ilk ölüm halı deyil. Bu il iyulda da həmin xəstəxanaya doğuş üçün müraciət edən Günel Vəliyevanın da aqibəti eyni olub. Araşdırmalardan məlum olub ki, 2024-cü ildə doğuş zamanı ən azı 4 qadın həyatını itirib və bu faktların hər biri bölgələrdəki xəstəxanalarda baş verib.

Bu halların qarşısını almaq üçün hansı qabaqlayıcı tədbirlər görülməlidir?

Ginekoloq Kifayət Adıgözəlova bildirib ki, bu halların bölgələrdə olmasının əsas səbəblərindən biri hamilələrin vaxtında tibb müəssisəsinə müraciət etməməsi, hamiləliyə hazırlıq dövrünün aparılmaması, erkən nikahların olmasıdır:

“Risk qrupuna aid olan hamilələr müəyyən edilməli və doğuşun hansı səviyyəli tibb müəssisəsində aparılmasını təyin edərək vaxtında göndərişlər verilməlidir. Normal fizioloji hamiləliyi olan xəstələr ən azı hamiləlik dövründə 7 dəfə xəstəxanaya müraciət etməlidirlər. Risk faktorları nəzərə alınaraq hamiləlik cərrahi yolla nəticələnə bilər”.