Donbasın asayişini qoruyan azərbaycanlı polislər danışdı: Şəhərin yarısı dağıdılıb

İl yarımdan çoxdur davam edən müharibə fonunda Ukraynada müxtəlif sahələrdə olduğu kimi, hüquq-mühafizə orqanlarında da azərbaycanlılar çalışır, ölümlə üz-üzə qalırlar.

Ən ağır şəraitdə xidmət göstərənlər isə ölkənin Donbas əyalətindəki soydaşlarımızdır. Onlardan Donetsk vilayətinin Pokrovsk şəhər polisləri, əslən Azərbaycanın Lənkəran şəhərindən olan Nurlan Nuriyev və qardaşı Rasim Nuriyev xidmət vaxtı hətta ağır yaralanıblar. Nurlan sağalaraq işinin başına qayıtsa da, Rasimin müalicəsi hələ də davam edir.

“6 il əvvəl qardaşımla birlikdə polis kimi çalışmağa başladıq. Çünki anlayırdıq ki, bizim qabiliyyətimiz, fiziki imkanlarımız burada işləməyimizə imkan verir. Əslində, uşaqlıqdan polis olmaq istəyirdik. 2014-cü ildən bəri Donetsk vilayətində hərbi əməliyyatlar davam edir. Buna görə də çətinliklərə öyrəşmişik. Odur ki, belə şəraitdə işləmək bizim üçün normaldır. Həm işimi layiqincə yerinə yetirdiyimə, həm də idman sahəsində qazandığım uğurlara görə medalla təltif olunmuşam.

Ukraynalılar bu sahədə çalışan azərbaycanlılara yaxşı münasibət bəsləyirlər. Çünki soydaşlarımız bu işə çox ciddi yanaşır və öz vəzifələrini layiqincə yerinə yetirirlər. Başa düşürük ki, həm də Azərbaycanı təmsil edirik və əsl azərbaycanlı kimi öz işimizə çox ciddi yanaşmalıyıq”, – azərbaycanlı polis Nurlan Nuriyev deyib.