Ekofəalların dünyaya verdiyi mesaj

Azərbaycanın təbii ehtiyatlarının qanunsuz istismarına etiraz olaraq ekofəallar və könüllülərin ötən il dekabrın 12-də Xankəndi-Laçın yolunda başlatdıqları aksiya artıq 100-cü gündür ki, davam edir.

Yüksək əhvali-ruhiyyə ilə dinc aksiya keçirən ekofəallar havanın qarlı, şaxtalı və soyuq olmasına baxmayaraq, öz şərəfli missiyalarını 100 gündür ki, davam etdirirlər.

Aksiyanın yüzüncü günündə Azərbaycanın tələbləri bütünlüklə yerinə yetirilməsə də, etirazçıların kifayət qədər böyük uğur qazandığını söyləmək olar. Ən azı dünya birliyinin diqqətini problemə cəlb etməyə nail oldular. Amma hədəf bütün tələblərin yerinə yetirilməsidir.

Milli Məclisin deputatı Elşad Mirbəşiroğlu da aksiya iştirakçılarının tələbləri tam yerinə yetirilənə qədər etirazlarını davam etdirəcəklərini deyir.

Qeyd edək ki, hazırda aksiyanın keçirildiyi Laçın yolundan hər gün Rusiya sülhməramlılarına və ya Beynəlxalq Qızıl Xaç Komitəsinə məxsus onlarla avtomobil keçid edir və dinc aksiyanın iştirakçıları həmin avtomobillərin maneəsiz hərəkətinə tam şərait yaradırlar. Yeni yolun guya bağlandığını iddia edən erməni mətbuatının yaydığı informasiyalar isə saxta və əsassızdır.