Ermənistan və Azərbaycan arasında sülhü ləngidən əsas səbəb: Hikmət Hacıyev açıqladı

“Ermənistan siyasi rəhbərliyinin qeyri-konstruktiv və qeyri-səmimi mövqeyi ucbatından sülh prosesi ləngiyir”.

Bunu “TASS”a müsahibəsində Azərbaycan Prezidentinin köməkçisi Hikmət Hacıyev sülh prosesinin hansı mərhələdə olduğunu şərh edərkən bildirib.

Onun sözlərinə görə, “Laçın” yolunun mövcud olmayan “blokadası” bəhanəsi ilə Azərbaycana qarşı İrəvan və dünyanın müxtəlif ölkələrində Qərbdəki erməni diasporunun koordinasiya etdiyi genişmiqyaslı dezinformasiya kampaniyası aparılır. Rusiya Qızıl Xaç Cəmiyyəti və Azərbaycan Qızıl Aypara Cəmiyyətinin birgə fəaliyyəti nəticəsində Ağdam yolu istifadəyə verilib.

“İndi biz Beynəlxalq Qızıl Xaç Komitəsinin yüklərinin eyni vaxtda iki marşrutla – Ağdam və Laçın marşrutu ilə getməsini gözləyirik. Beynəlxalq tərəfdaşlarımız bu mövqeyi tam şəkildə bölüşür və dəstəkləyirlər”, – deyə Prezidentin köməkçisi müsahibəsində bildirib.

Hikmət Hacıyevin sözlərinə görə, hazırda sülh prosesinə əsas maneə Ermənistanın Azərbaycan ərazisindəki qeyri-qanuni rejimi dəstəkləməsidir.

O qeyd edib ki, məhz Xankəndidəki qanunsuz rejim Ağdam və Laçın marşrutlarının eyni vaxtda açılmasına mane olur, Azərbaycandan ərzaq yüklərini qəbul etməkdən imtina edir və bunu sivil dünyada yeri olmayan mağara təfəkkürlü irqçilik motivləri ilə əsaslandırır.

Hikmət Hacıyev vurğulayıb ki, Azərbaycanda “boz zona”lara yer yoxdur.