Elə çörəyi yemək istəmirsənsə, sən də toxunma | Sakinlər gigiyenadan şikayətləndi

Çörək insanların gündəlik qidasının əsasını təşkil edir.

Amma bu bərəkət rəmzinə hər gün yüzlərlə insan toxunub sonra aldığı üçün o çörəklər artıq bir infeksiya mənbəyinə çevrilir.

Bəs bu cür məsuliyyətsizliyin, neqativ halların qarşısını necə almaq olar?

Məsələ ilə bağlı Azərbaycan Qida Təhlükəsizliyi Agentliyinin sektor müdiri İradə Hüseynli bildirib ki, çörək məmulatlarının satışı zamanı ümumi gigiyenik qaydalara riayət olunmalıdır:

“Məmulatların arabalara, yeşiklərə açıq şəkildə, əlcəksiz formada boşaldılması yolverilməzdir. Eyni zamanda özünəxidmət ticarət obyektlərində istehlakçılar tərəfindən çörək məmulatlarının seçilməsi üçün əllə təmas olmadan xüsusi köməkçi alətlərdən – metal naqqaşlardan, xüsusi qablarda yerləşdirilmiş ağ kağızlardan istifadə edilməlidir.

Bununla yanaşı, istehlakçıların və sahibkarların nəzərinə çatdırırıq ki, Qida Təhlükəsizliyi Agentliyinin kollegiya qərarı ilə yenicə təsdiq olunan çörək məhsullarına dair sanitariya norma və qaydalarında təsbit olunan gigiyena tələblərinə əsasən, çörək məhsulları yalnız qida təhlükəsizliyi sahəsində texniki normativ hüquqi aktların tələblərinə uyğun material və məmulatlardan istifadə etməklə qablaşdırıldıqdan sonra dövriyyəyə buraxılacaq”.

Qeyd edək ki, bu qaydalar 2025-ci ilin yanvar ayından etibarən qüvvəyə minəcək.