Əməkdaşımız xüsusi “test” apardı | Portağala vurulan maddə bizi belə zəhərləyir?

Qida Təhlükəsizliyi Agentliyi xaricdən gətirilən portağallara boya vurulduğunu təsdiqləyib.

Məsələ ilə bağlı qurumun açıqlamasında bildirilib ki, bütöv halda olan meyvə və tərəvəzləri müəyyən zərərvericilərdən qorumaq və onların əmtəə görünüşü üçün bəzi qida əlavələrindən və rəngləndiricilərdən istifadə edilir:

"Bu qida əlavələri istifadə şərtlərinə əməl edilməklə tətbiq edildikdə hər hansı bir zərərə səbəb olmur. Bu istiqamətdə ölkəmizdə agentlik tərəfindən müvafiq nəzarət və tənzimlə tədbirləri həyata keçirilir”.

Qida üzrə mütəxəssis Asim Vəliyev portağala rəngləndirici vurulduğu halda, bu barədə istehlakçıları məlumatlandırmağın önəmini vurğulayıb:

“Hər insanın immunitet sistemi fərqlidir. Xüsusilə allergiyası olanlar üçün bu kimi maddələr təhlükəli ola bilər. Ona görə də etiketlərdən istifadə etməklə və ya başqa yollarla vətəndaşları bu barədə məlumatlandırmaq mütləqdir”.

Həkim Abbas Bağırov isə portağala vurulan maddənin insan orqanizminə zərərlərindən danışıb.

“Bu rəngləndiricilər meyvənin səthinə vurulsa da, zaman keçdikcə diffuziya yolu ilə daha dərin qatlara nüfuz edir və meyvənin tərkibində bəzi kimyəvi dəyişikliklərə gətirib çıxarır. Bu da böyrək və qaraciyərin fəaliyyətində pozuntulara səbəb ola bilər”, – deyə həkim qeyd edib.