Emin Əmrullayev və Yusuf Tekin açılışda iştirak etdi | “Azərbaycan məhəlləsi”ndən ən son görüntülər

Türkiyədə 2023-cü ilin fevralın 6-da baş verən dəhşətli zəlzələdən bir ildən çox vaxt keçməsinə baxmayaraq, Azərbaycanın dəstəyi hələ də davam edir.

"Əsrin fəlakəti" adlandırılan hadisələr zamanı Kahramanmaraşın Azərbaycan məhəlləsi də dağılmışdı. Məhəllənin yenidən qurulması üçün Bakıdan gələn dəstəklə ilk olaraq Azərbaycanın ümummilli lideri Heydər Əliyevin adını daşıyacaq məktəbin tikintisi başa çatdırılıb.

İndi isə növbədə 1000 mənzilli yaşayış binalarının tikintisinin tamamilə yekunlaşdırılması var.

Bu barədə Türkiyənin "Haber Global" telekanalının hazırladığı reportajda deyilir.

Süjet 2 ölkənin qardaşlığının nümunəsi hesab oluna biləcək yerdə – Azərbaycan məhəlləsinin mərkəzində hazırlanıb. Məktəbin girişindəki abidəyə Heydər Əliyevin "Bir millət, iki dövlət" şüarı həkk olunub. Qeyd olunub ki, üçmərtəbəli məktəbdə şagirdlərin təhsili üçün hər cür şərait yaradılıb. Təhsil ocağının açılış mərasimində elm və təhsil naziri Emin Əmrullayev və onun türkiyəli həmkarı Yusuf Tekin iştirak ediblər.

Qeyd edək ki, 2025-ci ilin fevral ayına qədər Azərbaycan məhəlləsinin tikintisinin tamamlanması nəzərdə tutulur.