Ən ucuz evlər Bakının bu ərazisindədir | Ekspert ucuzluğun səbəblərini açıqladı

Bakıda satışa ucuz evlər çıxarılıb.

Belə ki, paytaxtın Səbail rayonunun Bayıl, 20-ci sahə qəsəbələrində təklif edilən evlərin qiymətləri digər ərazilərlə müqayisədə xeyli aşağıdır.

Daşınmaz əmlak saytlarına da nəzər salanda məlum olur ki, bu ərazilərdə ən ucuz evin qiyməti 22 min manatdır. Bu qiymətə Bayıl qəsəbəsində 1 otaqlı fərdi yaşayış sahəsi almaq olar.

Daşınmaz əmlak üzrə ekspert Elnur Fərzəliyev isə deyir ki, bu evlərin ucuz olmasına səbəb çıxarışla yanaşı, digər amillərdir:

“Səbail rayonu Bakı şəhərinin ən bahalı rayonlarından hesab olunur və 1-ci zonada yerləşir. Həmin ərazidə yerləşən torpaq sahələri, qeyri-yaşayış obyektləri və mənzillər digər ərazilərdən daha baha qiymətə təklif olunur.

Lakin rayonun Bayıl qəsəbəsinin bəzi hissələri və 20-ci sahə adlanan ərazidəki fərdi yaşayış evlərindən ibarət olan yaşayış massivləri sürüşmə zonasında yerləşir və gecəqondu tipli həmin evlərə çıxarışlar verilmir. Sözügedən ərazilərin yaxın gələcəkdə sökülərək park salınması gözlənilir”.

Ekspertin sözlərinə görə, qeyd edilən amillərin bu ərazilərdəki evlərə tələbatın azalmasına, təklifin isə artmasına səbəb olması qiymətlərin daha da enməsi ilə nəticələnir.