Əriyin bilinməyən faydaları | Əlimizin altında elə təbii vasitələr var ki...

XXI əsr müasir texnologiya, elm yüzilliyi olsa da, alimlər bəzi problemlərin həllini təbiətdə axtarırlar.

Yəni gözü mühafizə etmək, dərini zədələnmə və qocalmadan qorumaq üçün süni intelektə gərək yoxdur. Çünki əlimizin altında elə təbii vasitələr var ki, təpədən dırnağacan sağlamlıq üçün faydalıdır. Örnək kimi əriyi də göstərmək olar.

Əriyin tərkibində çoxlu antioksidantlar, göz və dəri hüceyrələrini zədələnmədən, vaxtından əvvəl qocalmadan qoruyan təbii maddələr var.

Bu meyvə həm də bağırsaqlar üçün faydalı olan pəhriz lifi ilə zəngindir. Bu barədə Klivlend Klinikasının qidalanma mütəxəssisi Bet Çervoni “The New York Post”a bildirib.

Həkim aydınlaşdırıb ki, ərik bədəndə A vitamininə çevrilən qiymətli beta-karotin mənbəyidir. Əriklərə yerkökü kölgəsinə bənzər parlaq narıncı rəng verən beta-karotindir. Ərikdə olan A vitamini də qırışların görünüşünü gecikdirməyə kömək edən kollagen zülalının istehsalını təşviq edir.

Bundan əlavə, meyvənin yüksək su tərkibi dərini nəmli və elastik saxlayır. Bağırsaqlarınızdakı faydalı bakteriyaları qidalandırır, çəkini idarə etməyə kömək edir və toxluq hissini uzun müddət qoruyur.

Bədəni liflə doyurmaq üçün ərik qurudulmuş formada istehlak edilə bilər. Quru ərikdə təzə meyvədən təxminən üç dəfə çox pəhriz lifi var. Bununla belə, quru əriklərdə daha çox şəkər olduğunu nəzərə almaq lazımdır.

Diyetoloq əlavə edib ki, ərikdə olan antioksidantlar sərbəst radikalları zərərsizləşdirir. Sərbəst radikallar dedikdə, hüceyrələrə zərər verə bilən və xroniki xəstəliklərin inkişafı ilə əlaqəli oksidləşdirici stres yarada bilən qeyri-sabit molekullar nəzərdə tutulur.

Ərik antioksidantları həm də bağırsaqlarda iltihabı azaltmağa kömək edir.