Ermənilər hava proqnozuna "Baku TV"də baxdı

Ermənistan Xarici İşlər Nazirliyinin mətbuat katibi Ani Badalyanın sosial şəbəkədəki paylaşımından belə görünür ki, Ermənistan rəsmisi Azərbaycan sinoptiklərinə inanır və hava proqnozuna Baku TV-də baxır.

Ermənistanın hava proqnozunda Azərbaycanın ayrılmaz hissəsi – Qarabağın da əksini tapması faktına göz yuman Ani Badalyan bizim telekanalın müasir Ermənistan ərazisində hava şəraiti ilə bağlı məlumat verməsinə qəzəblənib.

Bu məqamda xatırlatmaq tam yerinə düşər ki, qədim zamanlardan deportasiyaya qədər həmin ərazilərdə azərbaycanlılar yaşayıblar.

A.Badalyan Baku TV-nin hava proqnozuna İrəvan, Göyçə, Zəngəzur, Vedibasar və Dərələyəzin də daxil edilməsindən hiddətlənib və yanlış olaraq bunu ölkəsinə ərazi iddialarının sübutu kimi qiymətləndirib. “Bakı televiziyasında hava proqnozu zamanı Ermənistan Respublikası, o cümlədən paytaxt İrəvan Azərbaycan kimi təqdim olunur!”, – deyə A.Badalyan yazıb.

Bəli, doğrudur, bura Azərbaycandır, amma Qərbi Azərbaycan. Tarixən əzəli Azərbaycan torpaqlarıdır, hansı ki 20-ci əsrdə buradan yerli əhali üç mərhələdə qovulub. Bu gün Qərbi Azərbaycan Icması, yəni bu ərazilərdən qovulmuş yerli əhali heç bir halda Ermənistanın suverenliyinə və ərazi bütövlüyünə iddia etmir, əksinə, haqlı olaraq öz ata-baba torpaqlarında yaşamaq imkanını tələb edir.

Belə ki, Prezident İlham Əliyev 24 dekabr 2022-ci il tarixli çıxışında qeyd edib ki, qərbi azərbaycanlılar dəfələrlə qanunsuz deportasiyaya məruz qalmış bir toplumdur. Onların hüquqları bərpa olunmalı və öz doğma torpaqlarına qayıtmalıdırlar.