Ermənilərin sıradan çıxarılan texnikasının siyahısı açıqlandı

“Ermənistan silahlı qüvvələrinin döyüş postları və digər hərbi obyektlərini sərhəd xəttindən geriyə çəkmələrinə nail olunub. Aprelin 23-də təxribat-diversiya qrupu tərəfindən dövlət sərhədinin pozulması cəhdinin qarşısı alınaraq bir nəfər saxlanılıb”.

Bu barədə Dövlət Sərhəd Xidmətinin rəisi general-polkovnik Elçin Quliyev Dövlət Sərhəd Xidmətinin 2022-ci ildə xidməti döyüş fəaliyyətinin yekunlarına həsr olunan hesabat müşavirəsində bildirib.

Qeyd edib ki, 12-13 sentyabr tarixlərində dövlət sərhədinin Zəngilan rayonu ərazisindən keçən hissəsində bölmələrimiz tərəfindən ermənilərin genişmiqyaslı təxribatlarına cavab olaraq ağır sarsıdıcı zərbələr endirilib. Düşmənin 2 “S-300” divizionu, 1 "S-125" Zenit Raket Komplesinin buraxıcı qurğusu, 1 “S-125” Zenit Raket Kompleksinin atəş tuşlama stansiyası, 1 “P-18” tipli radiolokasiya stansiyası, 2 "Jitel" radioelektron mübarizə sistemi, 18 düşmən postu, çoxsaylı canlı qüvvəsi məhv edilib.

Elçin Quliyev bildirib ki, ötən il 774 nəfər dövlət sərhədini pozmağa cəhd edib və sərhədçilərimizin sayıqlığı nəticəsində bu halların 92,4% qarşısı uğurla alınıb. Xarici xüsusi xidmət orqanları ilə əlaqədə şübhəli bilinən 7 nəfər saxlanılıb.

Xidmət rəisinin sözlərinə görə, 2022-ci ildə 1 ton 383 kiloqramdan çox narkotik vasitənin, 36 milyon 592 min manatdan çox qaçaqmalın dövlət sərhədindən qanunsuz keçirilməsinin qarşısı alınıb. 24 ton 683 kq narkotik xassəli bitki məhv edilib.