Ermənistan ekoloji təhdidlər yaradır

Ermənistan ənənəvi olaraq regionun ekologiyası üçün təhdidlər yaratmaqda davam edir. İrəvan bu dəfə Naxçıvanla həmsərhəd ərazidə – Arazdəyəndə iri metallurgiya zavodunu inşa etməyə hazırlaşır.

Sözügedən zavod işə düşəcəyi təqdirdə zəhərli kimyəvi tullantılar bölgənin ekosisteminə böyük zərbə vura bilər. Tullantıların Araza axıdılması isə həm çaydakı canlı aləm, həm də çayın suyundan suvarma üçün istifadə edilən geniş təsərrüfatlar üçün təhlükə mənbəyi olar.

Ermənistan ekoloji terrora imza atmaqla, həm də beynəlxalq konvensiya və bəyannamələrin bəndlərini pozur. Rəsmi İrəvan bu addımı ilə “Sənaye qəzalarının transsərhəd təsiri haqqında” Bazel və “Transsərhəd kontekstində ətraf mühitə təsirin qiymətləndirilməsi haqqında” Espo Konvensiyalarının, o cümlədən “Təhlükəli tullantıların sərhədlərarası daşınmasına və kənarlaşdırılmasına nəzarət haqqında” Rio Bəyannaməsinin müddəlarını heçə sayır.

Azərbaycana qarşı bu ekoloji cinayət ilk deyil. Belə ki, Ermənistan bundan əvvəl “Metsamor” Atom Elektrik Stansiyasında təhlükəli vəziyyət yaradıb, Oxçuçayı çirkləndirib, Sərsəng su anbarını qurudub, Vejnəli, Qızılbulaq, Dəmirli və Söyüdlü qızıl və mis yataqlarını talan edib. Hətta bu cinayətlər əleyhinə azərbaycanlı ekofəallar ötən ilin dekabr ayında Laçın-Xankəndi yolunda 138 gün ekoaksiya keçirib.

Qeyd edək ki, Azərbaycanda fəaliyyət göstərən qeyri-hökumət təşkilatları Ermənistanın ekoloji fəlakətə yol açacaq yeni layihəsi əleyhinə bəyanat yayıblar. İctimai birliklər bölgəni təhlükəyə sürükləyən bu prosesi durdurmaq üçün hərəkətə keçməyin zəruri olduğunu vurğulayıblar.