Ermənistan vətəndaşı Laçında dövlət sərhədini pozub

Azərbaycan-Ermənistan dövlət sərhədində Ermənistan vətəndaşı saxlanılıb. Bu barədə Dövlət Sərhəd Xidməti məlumat yayıb.

Bildirilib ki, avqustun 1-də Dövlət Sərhəd Xidmətinin hərbi qulluqçuları tərəfindən Laçın rayonunun Zabux kəndi ərazisindən keçən hissəsində dövlət sərhədini pozmuş Ermənistan vətəndaşı, 1962-ci il təvəllüdlü Beqleryan Raşid Aramis oğlu saxlanılıb.

Raşid Beqleryanla bağlı bəzi detallar da üzə çıxıb. “Caliber”in məlumatına görə, o, “Laçın” sərhəd-buraxılış məntəqəsindən yan keçərək sərhədi adlamağa cəhd edib.

R.Beqleryan bildirib ki, guya “Spayka” humanitar yük daşıma şirkətinin sürücüsünün köməkçisidir. Lakin onun təxribatlar törətmək və ya belə əməllərə zəmin hazırlamaq məqsədilə Azərbaycan ərazisinə göndərilmiş Ermənistan xüsusi xidmət orqanlarının əməkdaşı olduğunu deməyə əsas var.

Hazırda faktla bağlı araşdırma aparılır.