Əsl bal necə olmalıdır? | Saxta balı müəyyən etmək üçün sadə üsullar

Balın sağlamlıq üçün faydalarından yararlanmaq və dadını həqiqətən hiss etmək üçün təbii balı seçmək olduqca önəmlidir.

Maraqlıdır, təmiz balı saxtasından necə ayırmaq olar?

Türkiyəli mütəxəssislər bu sualın cavabına çox asan üsullarla aydınlıq gətiriblər.

Ekspertlər təbii və həqiqi balı saxta baldan ayırmaq üçün bəzi asan üsullar tövsiyə ediblər. Xalis balı saxtasından fərqləndirmək üçün istifadə edə biləcəyiniz ən sadə üsullardan biri su testidir. Təbii bal suya töküldükdə həll olunmur və suyun dibinə çökür. Saxta balın tərkibindəki şəkər şərbəti isə suya qarışacaq. Bu üsulu sınamaq üçün bir qaşıq balı bir stəkan suya tökün. Əgər bal dağılmadan dibə çökübsə, demək ki, təbiidir. Balın təbii olub-olmadığını yoxlamağın digər bir asan üsulu isə yandırmaqla bağlıdır. Belə ki, bir kibrit çöpünü yandırıb balın içərisinə salın. Kibrit bir müddət yanmağa davam edərsə, bal təbiidir.

Bunun səbəbi odur ki, təbii bal su tərkibinə malik deyil. Saxta balda isə su və əlavə maddələr olduğundan alov sönür.

Xalis bal saxta bala nisbətən daha tünd rəngdə olur. Təbii balı qaşıqla tökməyə başlayanda ip kimi uzanır və kəsilmədən axır. Saxta bal daha açıq rənglidir və axıcıdır, qaba tökəndə axaraq qabın içinin formasını alır. Həqiqi bal isə qabın dibində qat-qat üst-üstə yığılır.

Əsl bal uzun müddət qalandan sonra kristallaşmağa başlayır. Saxta bal isə tərkibindəki əlavə maddələr səbəbindən uzun müddət öz tərkibini qoruyur və kristallaşmır.

Bununla da siz təmiz balı asanlıqla saxtasından ayıra bilərsiniz.