ƏÜO-da Heydər Əliyev və İlham Əliyev ilə bağlı tədbir

Əlahiddə Ümumqoşun Orduda ümummilli lider Heydər Əliyevin anadan olmasının 100-cü ildönümü və cənab İlham Əliyevin Azərbaycan Respublikasının Prezidenti seçilməsinin 20 illiyi ilə əlaqədar silsilə tədbirlər davam edir.

Bu barədə Müdafiə Nazirliyi məlumat yayıb.

Ulu öndər Heydər Əliyevin anadan olmasının 100-cü ildönümü ilə əlaqədar Əlahiddə Ümumqoşun Ordunun hərbi hissələrinin və Heydər Əliyev adına Hərbi Liseyin komandaları arasında viktorina keçirilib.

Əvvəlcə ümummilli lider Heydər Əliyevin və şəhidlərimizin əziz xatirəsi yad edilib, dövlət himni səsləndirilib.

Çıxışlar zamanı Heydər Əliyevin Azərbaycanın dövlət müstəqilliyinin, suverenliyinin və ərazi bütövlüyünün qorunub saxlanılması, eyni zamanda işğal olunmuş torpaqlarımızın azad olunmasını təmin etmək qabiliyyətinə malik Silahlı Qüvvələrin yaradılması yönündə apardığı mütərəqqi islahatlar barədə danışılıb.

Tədbirdə ümummilli lider Heydər Əliyevin həyat və fəaliyyətini əks etdirən videoçarxlar nümayiş olunub, ulu öndərə həsr olunmuş şeirlər səsləndirilib, rəqs və musiqi nömrələri ifa edilib.