Fazil Mustafadan sosial şəbəkələrdəki paylaşımlarla bağlı irad

“Bu gün Azərbaycanda cəmiyyət niyə müğənninin Yazıçılar Birliyinə üzv olmağını, Söyüdlü hadisələrini, şəmkirli iş adamının 250 min dollara müğənni gətirməyini müzakirə edir? Düşünürəm ki, biz ciddi məsələləri müzakirəyə çıxarmırıq”.

Bunu Milli Məclisin deputatı Fazil Mustafa parlamentin növbədənkənar sessiyasının iyulun 6-da keçirilən iclasında çıxışı zamanı deyib.

“Təhsil naziri ötən dəfə dərslərin sentyabrın 1-dən başlaması ilə bağlı təklif irəli sürdü. Ciddi məsələ idi, amma müzakirələr dayandı. Yaxud Böyük Britaniyanın “World University Ranking” nəşri 2023-cü ildə dünyanın ən yaxşı universitetlərinin reytinqini dərc edib. Reytinqə Qazaxıstanın 9 şəhərindən 21 universitet daxil olub. Müstəqilliyimizin 30 ilində bir Azərbaycan universitetini bu siyahıya daxil edə bilməmişik. Bu, ciddi düşünüləsi məsələdir”, – deyə millət vəkili qeyd edib.