FHN güclü küləklə bağlı xəbərdarlıq etdi - Baku TV

Yanvarın 11-i və 12-də Bakıda və Abşeron yarımadasında hava şəraiti dəyişkən buludlu, əsasən yağmursuz keçəcək.

Bu barədə Milli Hidrometeorologiya Xidmətindən məlumat verilib.

Bildirilib ki, 11-i gecə və səhər bəzi yerlərdə duman, az çiskin olacaq. Şimal-qərb küləyi səhər cənub-qərb küləyi ilə əvəz olunacaq, arabir güclənəcək. Havanın maksimal temperaturu 11-16 dərəcə isti olacaq.

Bölgələrdə də yaxın iki gün ərzində əsasən yağmursuz hava şəraiti gözlənilir. Mülayim qərb küləyi arabir güclənəcək. Havanın maksimal temperaturu Aran rayonlarında 13-18, dağlıq ərazilərdə isə 5 dərəcə isti olacaq.

Fövqəladə Hallar Nazirliyi (FHN) gözlənilən küləkli hava şəraiti ilə əlaqədar əhaliyə müraciət edib. FHN əhalini müvafiq təhlükəsizlik qaydalarına ciddi əməl etməyə çağırır.

Belə ki, güclü külək zamanı yüngül konstruksiyalı və müvəqqəti tikililərdən, bina və reklam lövhələrindən uzaq durmaq, elektrik dirəyi və naqillərin, hündür ağacların altında dayanmamaq tövsiyə olunur:

"Həmçinin güclü küləyin baş verən yanğınların söndürülməsi ilə əlaqədar yaratdığı çətinlikləri nəzərə alaraq küləkli hava şəraitində yanğın təhlükəsizliyi qaydalarına xüsusilə ciddi riayət edilməlidir.

Unutmayın ki, qaydalara biganəlik həyatımıza təhlükədir. Təhlükə zamanı "112" qaynar xəttinə zəng edin".