Film izləməyi sevənlərin diqqətinə | Hansı kinolar beynimiz üçün faydalıdır?

Filmlərə baxarkən insan beynində mürəkkəb fəaliyyət nümunələri yaranır.

Massaçusets Texnologiya İnstitutunun yeni araşdırmasına görə, beyin 24 fərqli şəbəkə və bölgə ilə səhnədən-səhnəyə dəyişir, filmin məzmununa uyğun olaraq müxtəlif fəaliyyətləri həyata keçirir.

Tədqiqatda “Inception”, “The Social Network” və “Evdə Tək” kimi filmlərdən seçilmiş bir saatlıq qısa kliplərə baxan 176 gəncin beyin fəaliyyəti süni intellekt vasitəsilə təhlil edilib. Beyin şəbəkələri filmin səhnə-səhnə məzmunu ilə əlaqələndirilərək insanların üz tanıma, hərəkəti izləmə, obyekt və məkanları müəyyənləşdirmə, nitq emalı və sosial qarşılıqlı əlaqə kimi müxtəlif fəaliyyətlərdə necə reaksiya verdikləri izlənilib.

Araşdırmada istifadə edilən funksional MRT beyin skanları göstərib ki, beyinin “icra nəzarəti” şəbəkələri, yəni planlaşdırma, problemlərin həlli və məlumatın prioritetləşdirilməsi ilə məşğul olan bölgələr filmin məzmunu çətin və ya qeyri-müəyyən olduqda işə düşür. Daha asan başa düşülən səhnələr zamanı isə beyin yalnız xüsusi funksiyaları olan bölgələri aktivləşdirir.

Bu araşdırma beyinin müxtəlif sahə və şəbəkələrinin təbii şəraitdə planını yaratmağa ilk cəhd kimi qiymətləndirilir.