Füzuliyə köçürülən ailə mina təhlükəsini görün necə aradan qaldırdı

Bu il Füzuli şəhərinə köçürülən Cəfərovlar ailəsinin üzvləri səyahətə çıxdıqları Xocavənd rayonunun Azıx kəndi yaxınlığında avtomobil yolunun kənarında tank əleyhinə mina aşkar edib.

Onlar bu barədə dərhal müvafiq qurumlara məlumat verib. Hadisə yerinə gələn ANAMA əməkdaşları tank əleyhinə 2 ədəd minanı zərərsizləşdiriblər.

Məhz mina təhlükəsizliyi ilə bağlı aparılan maarifləndirmə tədbirləri Cəfərovlar ailəsinin üzvlərinə mümkün faciənin qarşısını almaq imkanı yaradıb.

Belə ki, ailənin üzvü Xuraman Cəfərova torpaq qatı altında üzəri açılmış iki ədəd yad əşya gördüklərini bildirib. Bu sahədə məlumatlı olduqları üçün onların mina olduğunu dərhal anladıqlarını və təlimlər zamanı öyrəndikləri təlimata uyğun davrandıqlarını deyib. Bu isə böyük bir təhlükənin baş verməsinin qarşısını almağa imkan yaradıb.