Gölləri qurudub satanlar kimlərdir? | Üç qurum birləşib bir suala cavab verə bilmədi - Baku TV

Göllər müxtəlif vasitələrlə və müxtəlif növ tullantılar hesabına qurudulur, onların yerində isə yeni fərdi yaşayış evləri və tikililər inşa olunur. Son illər Bakı şəhərində və Abşeron yarımadasında bu cür hallar geniş vüsət alıb.

Belə ərazilərdən biri də Abşeron rayonu, Məmmədli kəndində yerləşən Məmmədli gölüdür.

Son illər gölün ərazisinin xeyli kiçildiyi müşahidə olunur. Onun qurudulduğu və yerində yeni fərdi yaşayış evlərinin tikildiyi ilə bağlı iddialar səsləndirilir.

“Qanunsuz olaraq torpaq, daş və hər cür zir-zibili gətirib buraya tökürlər. Məqsədləri ərazini qurutmaqdır. Bu barədə dəfələrlə yerli icra nümayəndəsinə və bələdiyyəyə müraciət etmişik. Deyirlər ki, xəbərləri yoxdur. Halbuki onların xəbəri olmadan bu işlərin görülməsi mümkün deyil. İcazə alaraq tullantıları gətirib tökürlər. Gölləri qurudurlar, sonra isə həmin sahələri satırlar. Yerində evlər tikilir – altı su, üstü quru”, – deyə sakinlərdən biri bildirib.

Mütəxəssislər bu cür halların yolverilməz olduğunu və gələcəkdə ciddi fəsadlara yol aça biləcəyini vurğulayırlar.

Daşınmaz əmlak üzrə ekspert Elnur Fərzəliyevin sözlərinə görə, vətəndaş fərdi yaşayış evi alarkən mütləq şəkildə həmin ərazinin torpaq tarixini araşdırmalıdır:

“Əgər həmin ərazi vaxtilə gölməçə və ya qamışlıq sahə olubsa, zaman keçdikcə tikililərin deformasiyaya uğraması qaçılmazdır”.