“GreenCard” qazananların şifrəsi gizlədildi | 800 dollar istəyirlər…

Emin Əbdülhəsənov və Vəli Quliyev Amerika xəyalı puç olanlardandır.

Onlar deyirlər ki, “GreenCard”ın nəticələri açıqlansa da, udub-udmadığını yoxlaya bilməyiblər. Çünki “Green Card Azərbaijan” şirkətinin əməkdaşı onları qeydiyyatdan keçirərkən şifrələrini verməyib.

Müvafiq şifrə həm də viza üçün müraciət, eyni zamanda viza müsahibəsi əlçatan olarsa, bu barədə məlumat əldə etmək üçün vacibdir.

Emin Əbdülhəsənov və Vəli Quliyev kimi şifrəsi verilməyən xeyli insan var. Onlar sosial şəbəkələrdə bununla bağlı şikayətlərini paylaşıblar. Bildiriblər ki, “GreenCard Azərbaijan”ın əməkdaşı qeydiyyatdan keçənlərin parollarını özündə saxlayır, əgər müraciət edənlər seçilibsə, həmin nömrə müqabilində onlardan minimum 800 dollar istəyir.

Bəs şifrəsi olmayan insanlar hara müraciət edə bilər?