Gürcüstanda kazino sektorunun illik dövriyyəsi nə qədərdir? | Statistika açıqlandı

Azərbaycanda lisenziya tələb olunan fəaliyyət növlərinin siyahısı genişləndirilir. “Lisenziyalar və icazələr haqqında” Qanuna təklif edilən dəyişiklik layihəsinə əsasən, bu siyahıya Xəzər dənizinin Azərbaycana mənsub bölməsində süni torpaq sahələrində kazino oyunlarının təşkili də əlavə edilir.

Həmçinin “Dövlət rüsumu haqqında” Qanunda da dəyişiklik edilməsi təklif olunur. Sənədə əsasən, kazino oyunlarının keçirilməsinə görə 340 min manat dövlət rüsumunun ödənilməsi nəzərdə tutulur.

Maraqlıdır, bu, ölkə iqtisadiyyatına nə qazandıra bilər?

Dünya təcrübəsinə nəzər saldıqda iqtisadiyyatın şaxələndirilməsi üçün müxtəlif sahələrin inkişafına ehtiyac var. Belə sahələrdən biri də turizmdir. Bu baxımdan Azərbaycana gələn turistlərin sayının artması turizm infrastrukturunun daha da inkişaf etdirilməsini, əlavə istirahət və əyləncə obyektlərinin açılmasını tələb edir.

İqtisadçı Xalid Kərimli bildirib ki, Azərbaycanın turizm iqtisadiyyatını genişləndirmək üçün böyük potensialı var.

“Kazinoya yalnız oyun kimi baxmaq olmaz. Nəzərə almaq lazımdır ki, kazinolar turizmin inkişafına dəstək verən amillərdəndir”, ‒ deyə o bildirib.

Region ölkələrinə nəzər yetirdikdə məlum olur ki, təkcə qonşu Gürcüstanın 2024-cü ildə kazino sektorunun dövriyyəsi 28 milyard ABŞ dolları olub. Qazaxıstanda kazino biznesi də ölkəyə xeyli gəlir gətirir. 2023-cü ildə Qazaxıstanın dövlət büdcəsinə kazinolardan 245 milyon dollar vergi ödənilib.

Həmçinin 2023-cü ildə Rusiyada kazino sənayesinin ümumi gəliri təxminən 2,1 milyard avro təşkil edib. Hətta Birləşmiş Ərəb Əmirliklərində də uzun illər qadağan olunan kazinoların fəaliyyətinə icazə verilir və 2027-ci ildə ilk kazinonun açılması gözlənilir.