Hansı əməliyyatlar limitli sayda sığorta ilə qarşılanır?

2023-cü ilin avqust ayından bu ilin avqust ayına kimi 145 sayda transplantasiya əməliyyatı icra olunub. Bunlardan 71-i böyrək, 71-i qaraciyər, 3-ü isə sümük iliyi transplantasiyasıdır.

Bu barədə İcbari Tibbi Sığorta üzrə Dövlət Agentliyindən məlumat verilib.

Bildirilib ki, transplantasiya əməliyyatları İcbari Tibbi Sığorta üzrə Dövlət Agentliyinin müqavilə bağladığı özəl, eyni zamanda dövlət qurumlarının tabeliyində olan müvafiq tibb müssisələrində və Səhiyyə Nazirliyinin tabeliyində olan Milli Hematologiya və Transfuziologiya Mərkəzində icra olunur.

Əgər pasiyentə orqan çatışmazlığı diaqnozu qoyulubsa, bu halda o, Səhiyyə Nazirliyinin tabeliyində olan “Orqan Donorluğu və Transplantasiyası üzrə Koordinasiya Mərkəzi”nə yönəldilir.

Mərkəz vətəndaşdan müəyyən sənədləri toplayır və ehtiyac olduğu halda donor orqanlarının saxlanılması, idxalı, ixracını həyata keçirən müvafiq tibb müəssisələrindən birinə yönləndirir. Bu halda vətəndaşın tibb müəssisəsini və həkimi seçmək hüququ var.

Qeyd olunub ki, transplantasiya əməliyyatında həm donorun, həm də resepiyentin əməliyyatı icbari tibbi sığorta ilə qarşılanır. Stasionarda yatış, dərman, qan və qan komponentləri, tibbi sərf, müəyyən instrumental və laborator müayinələr icbari tibbi sığorta hesabına ödənişsiz icra olunur.

İcbari tibbi sığortanın Xidmətlər Zərfində transplantasiya əməliyyatlarına illik limit tətbiq olunub. Qaraciyər üzrə 100, böyrək 150, sümük iliyi üzrə isə 20 əməliyyat müəyyən olunub.