Hava şəraiti barədə sürücülərə xəbərdarlıq | AAYDA gücləndirilmiş iş rejiminə keçdi

Azərbaycan Avtomobil Yolları Dövlət Agentliyi (AAYDA) qış fəsli ilə əlaqədar olaraq gücləndirilmiş iş rejiminə keçib.

Bu barədə Agentlikdən məlumat verilib.

Məlumata görə, Bakıda Agentliyin xidmət etdiyi küçə, prospektlərdə, həmçinin respublikanın avtomobil yollarında, xüsusən dağlıq və dağətəyi ərazilərdən keçən yollarda qarlı, şaxtalı hava şəraitinin avtonəqliyyat vasitələrinin fasiləsiz, eyni zamanda təhlükəsiz hərəkətində yarada biləcəyi hər hansı problemi aradan qaldırmaq məqsədilə maşın, mexanizm və texnikalar hazır vəziyyətə gətirilib, tələb olunan miqdarda qum, həmçinin texniki duz ehtiyatı toplanıb.

Qarın çox yağdığı və buzlaşmanın olduğu yollar nəzarətdə saxlanılır, avtonəqliyyat vasitələrinin təhlükəsiz, fasiləsiz hərəkətinin təmin olunması məqsədilə qabaqlayıcı tədbirlər görülür. Agentliyin yollarda hərəkətin fasiləsizliyi, təhlükəsizliyi istiqamətində atdığı addımlara baxmayaraq, nasaz, şinləri mövsümə uyğun olmayan və təcrübəsiz sürücülər tərəfindən idarə olunan avtonəqliyyat vaitələrinin hərəkətində problemlər yarana bilər.

Həmçinin bu cür sürücülər digər hərəkət iştirakçılarının da hərəkətinə mane olmaqla yollarda sıxlığın yaranmasına gətirib çıxara və qar təmizləyən texnikaların problemli ərazilərə cəlb olunmasına maneə törədə bilərlər. Bu səbəbdən sürücülərin də qış fəslinə hazır olmaları və idarə etdikləri nəqliyyat vasitələrini qış fəslinə uyğun təchiz etmələri xahiş olunur.

Vətəndaşlardan avtomobil yollarında yarana biləcək hər hansı problemlə bağlı Agentliyin Çağrı mərkəzinə (012-599-79-75) zəng edərək məlumat vermələri xahiş olunur.