Heç bir dövlətdə vətəndaşlığı olmayan şəxs çıxılmaz vəziyyətdə | "Nə olsun ki, getmişəm?" - Baku TV

Baku TV-nin qaynar xəttinə daxil olan şikayətdə Elşad Mikayılov adlı şəxs bildirib ki, illərdir heç bir dövlət tərəfindən vətəndaş kimi tanınmır.

Bir zamanlar yaşadığı nə Rusiyada, nə Ukraynada, nə də doğulub boya-başa çatdığı Azərbaycanda ona rəsmi vətəndaşlıq statusu verilmir.

Pasportunun müddəti bitən və hüquqi olaraq çıxılmaz vəziyyətdə qalan Elşad Mikayılov probleminin ictimailəşdirilməsini və aidiyyəti qurumların məsələyə münasibət bildirməsini istəyir.

“Göndərişlə oxumağa Ukraynaya getmişdim. SSRİ dağılandan sonra pasportuma kağız əlavə etdilər ki, rus vətəndaşı kimi qalırsan. Ukraynada birinci çevriliş başlayanda, hamı kimi mən də çöldə qaldım. Azərbaycana gələndə, pasportumun müddətinin qurtarmağına az qalmışdı. Sərhəddə mənə pasportu dəyişib qayıtmalı olduğumu dedilər. Söylədilər ki, bunu etməsən, səni Ukraynaya buraxmayacağıq”.

Şikayətçi əlavə edib ki, iki dəfə Şirvan Şəhər İcra Hakimiyyəti başçısının qəbulunda olsa da, probleminin həllinə baxılmayıb:

“Mən sizin şəhərinizdə necə qanunsuz yaşayıram?! Niyə bu məsələyə baxan yoxdur?! İnsult keçirmiş adamam, amma sənədsizəm deyə müalicə oluna bilmirəm. Ailəm Ukraynada qalıb. Uşağın 14 yaşı var, ona kömək edə bilmirəm”.