Həkimdən açıqlama: Covid-19 həmişə həyatımızda olacaq

Pandemiya və ya növbəti dəfə qlobal sağlamlıqla bağlı fövqəladə vəziyyət başlana bilər. 2019-cu ildə də belə oldu.

Ümumdünya Səhiyyə Təşkilatının baş katibi Tedros Adhanom Qebreyesus COVID-19 pandemiyasının hər an yenidən alovlana biləcəyini bildirib.

Bəs Azərbaycanda vəziyyət necədir?

Terapevt Sübhan Hacıyev COVID virusunun həyatımızda bundan sonra da olacağını, amma pandemiya şəklində epidemiya yaratmayacağını bildirib:

“Çünki virusun digər ştamları olsa da, bizim orqanizmimiz hüceyrə səviyyəsində artıq bu virusu tanıyır və müəyyən anticisimlərimiz vardır ki, onlarla mübarizə apara bilir. COVID-19-un artıq əvvəlki qədər ölümlər yaratmaq təhlükəsi yoxdur”.

Qeyd edək ki, Azərbaycanda son 1 həftə ərzində koronavirus infeksiyasına 95 yeni yoluxma faktı qeydə alınıb. Ölkədə son 1 həftə ərzində vaksinasiya olunmayıb. Azərbaycanda bu günə qədər vurulan vaksinlərin ümumi sayı isə 13 969 897 ədəd olub.